Pason Kointutunan / Kabar Nopili

Kopisanangan kumaa toinsanan tompinai om tambalut Dusun. Minaanku pohoroo o bolog diti sobaagi do ponimungan di bobolog i pinosurat doid boros Dusun. Alansan oku kumaa do tongotompinai om tangatambalut di kiharo bolog toi ko nokoilo do haro bolog om nunu nopo iri pinosurat id boros Dusun toi ko Kadazan (Tulun Kadai /Tangara) do popoilo doho maya do bolog 'Iso Dusun' diti. Kanou no misokodung do popoingkakat babasaon do id tompok tunturu tu insan tadau, tulun Dusun om woyoboros Dusun nga kotongkop nogi id sompomogunan.  | 

TUTUMANUD

Friday, January 27, 2012

Kodusun-dusunan ku

Odoi mah doho diti,
Nasansagan do popopoingkakat i boros do soborong,
id longkod do pingludaan do mongingia,
Nasansagan do monoriuk i boros it okon ih ko' doho'd songonuon,
Nga' kuroyon po om kuroyon,
Iri no ralan di pinatantu di porinta montok doho.

Nonggo nodi o kointutunan ku?
Nokuro tu pinomoloyuan oku'd komolohingan?
Nokuro tu a' oku diyolo barasan do Dusun?
Osiriba tuu boros do Dusun?
Gisom do iyo'ddi winonsoi diyolo ?

Boros do soborong,
pinakai id pinogibabarasan,
dot a' piya otulid om abalantas o kararangahai.
Iti no konosipan do tulun toko'.'

Doho'd kanto sala',
tu a' kopio pointalang o kointutunan ku..
tu ingkurian oku do mimbolotok id boros di pinotungkus,
i kolisihan om kasananganku kopio,
gama' dot a' nounsuban di tongo komolohingan om kompinaian
i sompii ko' tulun Dusun id posorili doho.

Sundung piya oluhoi po o kointutunan ku,
pointindohoi ih daa kasai,
iti boros do Dusun id lugu do ginawo ku,
Maha daa mompus-ompus indo o pinsingilaanku
do mimboros om monurat id boros do Dusun.

11/1/12 (11.39 pm)

No comments:

Post a Comment