Pason Kointutunan / Kabar Nopili

Kopisanangan kumaa toinsanan tompinai om tambalut Dusun. Minaanku pohoroo o bolog diti sobaagi do ponimungan di bobolog i pinosurat doid boros Dusun. Alansan oku kumaa do tongotompinai om tangatambalut di kiharo bolog toi ko nokoilo do haro bolog om nunu nopo iri pinosurat id boros Dusun toi ko Kadazan (Tulun Kadai /Tangara) do popoilo doho maya do bolog 'Iso Dusun' diti. Kanou no misokodung do popoingkakat babasaon do id tompok tunturu tu insan tadau, tulun Dusun om woyoboros Dusun nga kotongkop nogi id sompomogunan.  | 

TUTUMANUD

Thursday, July 19, 2012

Koihadan di tanak bandar


Kinosusuonku om kinagayaanku id bandar,
Pinoposondot komogoton om koburuon doid doho,
Nga norubat o tanak bandar,
Tu kiharo piya kasananganan,
nga mosikin id kotos do koubasan
Dusun piya o tinaru,
nga aiso ih toilaan do mimboros,
gama do a' pinotuduk di komolohingan,
Do popoingkawas ningkokoton do koposion o pounayan diolo..

Mulong piya do poingkaa,
Potondulionku nopo i ralan do koposionku,
Iyo di nawayaan di taki-aki ku id timpu di nokodori,
Pinsingilaanku ngaii i kotos do boros tinungkusan.
Koinsanai nopo di minog dot oilaan..
Om baino kitoilaan oku nodi
dot a' piya noompus o toilaanku.
Nga a' nodi koiyo di kabalantaso di taki-aki ku..

Kohondom oku timpu di laid,
Di maso do magkarasala oku do mimboros,
gisom dot ointotorian di tulun.
Om nokosorou oku nogindo nung sokiro daa
okon ko sinakagon oku do Dusun,
aiso nondo paantakanku do tumanggung indoh ngaii..

Somoonu oluhoi o ginawoku,
Okurian do kinoris do sumaralom doid kolumisan do boros tokou,
Tu ogumu po dit a' noilaan,
Om osodu po o pamanahonku.
Om id tindalanon nopo diri,
Morou-sorou oku nopo,
I kinosilapan di komolohingan,
Osonong daa piya paantakan diolo
do popoingkawas ningkokoton,
Nga nokuro tu pinotolikudan diolo o boros tinungkusan dit olumis,
Om pinoluhoion diolo i kagarasan do boros tokou.

Nung sokiro daa malub-talub o boros tokou,
Gisom dot opunsoh,
Kosiliu nondo koimbagu iso koihadan,
koihadan di tanak bandar,
i sinakagon do Dusun,
koihadan di poingompus..
Tu natanus nodi boros tinungkusan.
Sinuratan di Andreas Alex (19/04/2011)

No comments:

Post a Comment