Pason Krismas

 Mamason oku do kotobian tadau tagayo do Krismas 2011. Toririmo noh daa do awanadan tokou do Minamangun.

Posurato noh pason Krismas do hiti.

Download Borang Permohonan Bantuan Rakyat 1Malaysia

Tumimpuun di 10/12/2011 poom do pangaplaian sokodung 1Malaysia milo nodi do onuon (download) mantad id natadwib Komontirian Kotusinan Malaysia. Noputan nopo nga hiti id Borang Permohonan BR1M.

Kooturan nopo do mokianu sokodung diti nga;

1. Mamasok Malaysia
2. Kusai toi tondu di momuruan do paganakan miampai do ginumu koonuan RM3000.00 toi id siriba ko ilo.
3. Tulun nongolohing i kiumur 60 toun om osongulunan (pointobilang) i kitoonuan RM3000 om id siriba ko ilo.

Soira do mangapalai (mokianu) potonudon noh;

• Mykad / Kad Pulis / Kad Susumangod  (Amih / Tantara)
• Pongiraan toi risit do gaji i kawawagu montok di mokikianu do gogojian.

Tadau koponutupan do kopongoromitan do poom diti nopo nga ontok 10 Januari 2012.

DONLOD / DOWNLOAD BORANG

Korita Toun 2011

Korita Toun 2011 do nopili di NST-Maybank COTY 2011 nopo nga Peaugeot RCZ.

Peugeot RCZ nopo nga kop di kitirikohon do 2+2, ginonop miampai do gior longonon toi oporian. Korita diti momoguno do injin do 1.6 lito kikuasa do turbo ‘twin-scroll’. Iri nopo kigior oporian nga kapalabus do 156 bhp om 240Nm tork nga iri gior longonon nopo nga kapalabus do 200 bhp om gisom do 275Nm tork.

Kopongoruhang nopo do ginoris RCZ diti nga tinambaan do aerodinamik pointantu miagal do spoiler id dohuri. Spoiler poindohuri i kopinggura kumaraja popoimbang tinan om pomogunaan tumau injin tumanud do siniau papamanau id talun-alun.


Nung kolobi 85 km/j ot sinaiu, mungkalad id sudut 19 darjah (Posisi 1) om koguli do olopi id siriba do siniau 55 km/j ot siniau. Id sinaau kolobi do 155 km/j, spoiler ponontohuri mungkalad id sudut 34 darjah om koguli id posisi 1 montok siniau 145 km/j. Suai ko ilo, iri doribo milo dopopoungkalad di spoiler ponongtohuri momoguno do butang id konsol tanga.

http://www.arenakereta.com/21/05/2011/peugeot-rcz-dilancarkan-dengan-harga-sekitar-rm219k-rm224k/

http://www.caroftheyear.org/media/news/RCZ/the/fun/Peugeot/_45/coty

Sudawil Do Koposion

(Facebook)

Andreas Alex John

ogumu tuwa mogikawo-kawo,
aakanonku marahang aragang kabang;
Kuroyon podi aiso sawo,
nadalaan kinosokoyut aiso muhang..

sumandak magatul-gatul,
imuri-murion turos sondiri,
mogot nogi poimbilang salajul,
koposion sondiri tinan sondiri.

olumis-lumis ilo bawang,
bawang tolumis id disan do koporingan;
kada popoinsiriba tulun di poimbilang,
tu iyolo nga tulun winonsoi'd Kinorohingan

tuni do tombolog opian-pian,
mulud-tulud moi sako' doid raan;
au monguro nung agayo tian,
tu okon ko soliwan intangan do kinorohingan

Linumis-numis i gonob do wagu,
gonob poinsidang id natad do walai;
linundus di yumandak linangkas di tanakwagu,
okon ko kotimporon gisom do tikapatai.

osinggawa kawalaian sopidoros-doros,
oruhai kapalid dot amu mokitunud;
aiso guna' nung olumis o koturos,
nga' oitom o ginawo tirad di tangud.

Kapahabaran Dusun

"Kapahabaran' nopo nga kopononsunudan do kabar-kabar tosonong maya do totongonon, susuyan, sisindiron, sisindingon om nunu nopo i poinsurat toi pinosunud nopo. Boros diti naanu mantad patod boros 'habar' i kikomoyon do kabar tosonong.

Kapahabaran doun Dusun di pogulu nopo nga maya do susunud tu ingaa poh gia koilo do monurat ontok diri. Sundung do ingkaa, nokotilombus iti tu iri no ralan do paparati kumaa tangaanak kokomoi do kopoposion id pomogunan.

Otumbayaan oku do tulun Dusun di pogulu nopo nga haro nogi karalano do ponunurat nga awu nokosurat id watu toi id kulit-kulit do buru-buru. Ponunurat nopo diolo nga id roun do kayu i roitan do 'purak sambalik'. Roun diti luangan momoguno do sondulu om iti noh i gunoon diolo do mongintob om mongontong do koulah-ulahon tadau miagal do magadau, rumasam toi nunu nopo. Sinuratan diolo nopungaranan do 'pimato' tu momoguno do luang id roun. Nung posombolikon iti roun nga apalid nodi komoyon om rinoitan do 'purak sambalik' tu kotunud nung intaan mantad id boogian topurak. Soira nokoinggumu i pimato, tinimung iti om pinosuang id rugut nga obinromuk gia iti nga awu i natagak tu noowit iti gisom noh do baino.

Notungkusan iti tu tulun Dusun nga maid-laid nga mukod-sukod nogi toilaan om nokoruba nodi do tapui. Tapui diti nointutunan diolo maya do kinopiduntukon do duo watu. Dusun di pogulu nopo nga poposikit do tapui maya do duo watu topurak i piduntukon om haro gapas do giman (awu oku kosorou do nunu pongoroitan). Poninikit do tapui diti pinungaranan do 'titikan' tu popitutukon gia do posikit. Mantad do tapui, nokowonsoi do 'kuron' om i pimato diolo nokosurat id kuron. Kikotumbayaan do ponunurat 'abjad' A-B-C do baino nopo nga mantad do pimato tu maya do ponunurat id roun kayu, tantu do koundalih id kuron, id tolig do kuang (kinoyonon diolo).

Susuyan diti pinosusui do molohingku di toun 1987 poh om baino, kosorou ku noh om umbalai ku noh do mogihum nunu no sinuratan id roun nga iti noh nokitoku, http://id.wikipedia.org/wiki/Lontar. Sundung do misuai iti 'purak sambalik' om 'lontara' nga agayo kotumbayaanku do sinuratan diolo nopo diti nga mantad do karalano ponunurat 'pimato' doun Dusun om yolo nopo diti nga Dusun i di pogulu poh.

Komoiboros:

1. kapahabaran - kesusasteraan
2. totongonon - cerita mitos
3. susuyan - sejarah (cerita benar dalam bentuk lisan)
4. habar - berita baik
5. kabar - berita baik atau buruk (berita)
6. purak sambalik - sejenis daun kayu
7. rugut - bekas diperbuat daripada buluh
   
8. pimato - abjad Dusun menggunakan lubang dalam daun 'purak sambalik'
9. titikan - sebagai pemula api pada zaman dulu
10. kuron - pelbagai jenis pinggan mangkuk dan periuk belanga yang dibuat daripada tanah liat
11. kuang - gua
    

Gambar mantad: http://id.wikipedia.org/wiki/Aksara_Lontara

SISINDIRON: KOSIMBAYANANKU

KOSIMBAYANANKU


Norikot nodi tadau do kosimbayanan ku,
Nakatalib nodi toinsanan i pinapawagat pomusarahan ku,
Nokotimpuun nodi i tadau do koundarangan,
mantad di kinorikatanku doid tana' do kinogoyoon ku.


Iti no daa o kalansanan ku,
Moi daa toririmo nopo osonong o ginawo ku,
Do monoguwang timpu do koundarangan diti.
Lihuan ku po daamot o konunu-nunuan di dong kosikul-sikulan,
Tu osodu po o timpu do momusou indoh.


Id timpu do koudarangan diti,
Alansan oku daa dot alangga nopo o pomusarahan ku.
Maha' daa om muhang-ruhang nondo o kotoronongon do pomuragadan ku.
Maha' daa om aiso nondo kobolingkahangan
di kopomohukot do pomusarahan,
Om toririmo nondo dot osonong o topurimanan ku,
do solinaid do tadau do koundarangan diti.


Id kosimbayanan ku ngai',
Sipomonsoi oku daa it osonong,
tumanud do korohian do Kinorohingan.
Moi dot a' oimbayatan o ginawo ku,
do monuhuk korohian di dong tinan,
i kapamaraag do pomusarahan dit osonong,
om i kayamut nopo iman-imanon dit olidang.



Nung sokiro daa kisinundu oku,
Om kopomutalad oku nogi,
Mintulud oku nondo id soribau do pomogunan,
Do mogihum i babang do buluntung,
do maan do ponokososokoon om ponokotindai-tindai.
Nga kuroyon podi tu tulun oku toomod,
Dot iri piya ot iman-imanonku do papalangga i pomuragadan ku.


Ondung kotindohoi o timpu,
osimbayan oku daa'ndoh gisom dot alaid,
nga' kuroyon podi tu a' miloh do potingkodon o timpu,
tu iri no katapatan di poingharo mantad.
Iri no tu timpu nga' malib-talib nopo,
gisom do kolimpupuson do tadau do koundarangan diti,
Komoyon do ko'oiyon do tadau do kosimbayanan.
Nga okon ih ko' iri ngai' o kopomusou doho,
tu iri no o kowoowoyon do timpu di natantu mantad.


Pagatangon ku o timpu ku ngai',
Do solinaid do haro po o kosimbayanan ku,
Om manu oku daa,
dot a' nondo orubatan o timpu ku ngai',
Gisom do kolimpupuson do tadau do koundarangan diti.



Sinuratan di : Andreas Alex John [Pitimungan Do Dusun (Group)]
20.11.2011
jam 20:11 (8.11pm)

Jambatan Tamparuli

Kosorou kou poh di sinding Jambatan Tamparuli? Awu nopo kosorou nga haro iti pinadalinku do id woyoboros Dusun kawawagu om rinoitan do 'Sunsuyon Tamparuli'.


Pak pak kangkundo
Sumunsui do sunsuyon
Sunsuyon do Tamparuli
Kikasut gontod tawakas

Sumunsui do sunsuyon
Sunsuyon do Tamparuli
Pak pak kangkundo
Kikasut gontod takawas

Norubat no di kasut ku
Naratu hilo sunsuyon
Sutakin po di noolu
Noowit ku ginumuli

Ontok di tadau madsa
Tomu id Tamparuli
Mingusuk po hilo kadai
Mokikasut gontod takawas


Mantad do sinding dilo, simbaro iti ponguhatan.

1. Id nonggo konoyonon do Sunsuyon Tamparuli?

A. Tombunan
B. Tamparuli
C. Kota Kinabalu
D. Sarawak
E. Tinom


2. Id nonggo kinorotuon do kasutku?

A. Hilo sahau sunsuyon Tamparuli
B. Hilo tomu Tamparuli
C. Hilo id walai di Yanak-anak
D. Hilo kadai pangakanan id Pakan Nabalu
E. Hilo id tomu Kuta Bulud

3. Nokuro tu miningusuk oku hilo id kadai?

A. Momoli do saging
B. Gusaon do pulis
C. Papadagang do layoh om paranggi
D. Momoli do sutakin
E. Momoli do kasut gontod takawas


4. Ontok tadau kopiro haro tomu id Tamparuli?

A. Magus
B. Madsa
C. Mansak
D. Kurudu
E. Tadau-tadau


5. Suangai do boros pomogonop i kopiagal komoyon do 'naratu'.
____________ iri kasut gantad takawas disio.


A. Nokodungur
B. Nobubus
C. Nolimpak
D. Natatak
E. Nasaug

Isai orohian do monimbar, mangai nopo simbaro tu kopongoruhang nogi diti do toilaan tokou.