Pason Kointutunan / Kabar Nopili

Kopisanangan kumaa toinsanan tompinai om tambalut Dusun. Minaanku pohoroo o bolog diti sobaagi do ponimungan di bobolog i pinosurat doid boros Dusun. Alansan oku kumaa do tongotompinai om tangatambalut di kiharo bolog toi ko nokoilo do haro bolog om nunu nopo iri pinosurat id boros Dusun toi ko Kadazan (Tulun Kadai /Tangara) do popoilo doho maya do bolog 'Iso Dusun' diti. Kanou no misokodung do popoingkakat babasaon do id tompok tunturu tu insan tadau, tulun Dusun om woyoboros Dusun nga kotongkop nogi id sompomogunan.  | 

TUTUMANUD

Friday, May 2, 2014

Tosung Om Tooluh

Norikot nodi kapamaramaian do kaamatan toun diti. Pointongkop kampung om watas nga nokopotimpuun nodi do mangaramai kaamatan. Mogisusuai ralan do popohimagon ponimpuunan karamaian. Haro ii popokito do mongomot, mongogik parai, monutuh parai toi ko monuntung do tagung. Oinsanan koimaan dilo popokito do kounsikahan montok di asil pinorobuatan solinaid sontoun.

Osorouku, kinaantakan maso di tokoro oku poh soira nakatanud oku do songulun tambalutku. Ontok diri nopo nga minindahu o molohing diolo om alalaid noh do awu nokouli. Walai diolo nopo diti nga id disan do baang om tindohuon do molohing diolo nopo nga id timpak nuluh.

Koubasanan do moginodop ii molohing disio gisom solinaid do tolu tadau om somonu korikot nogi do sominggu. Molohingku nga nokoumbal nogi moginodop id tindohuon toi roitan dahai doid sulap id sokid. Nga okon ko goduduo (tama om tapa) doid sokid. Koubasanan do ii tapa (molohing kusai) noh moginodop. Iri nga sororuhai-ruhai nopo. Monikid duo tadau om koruhuk noh tu mongoi gia sago do waig.

Miagal dahai, yolo diti nga mororbuat nogi. Sundung do miagal nogi konu-onuan do molohing dahai nga okitoku do awu songkuro kopopoosion diolo. Ontok diri nakatanud oku nogi disio do mongoi pongolos do wagas. Tumanud di tambalutku, noubas noh yolo do mongolos do wagas.

Haro parai diolo tu morobuat yolo. Nga nokuro tu mongolos do wagas?

Id walai diolo, ogumu parai. Tulunan diolo nga parai. Nga ingaa tosung om tooluh diolo. Soira do poposidang yolo do parai, rangkaton diolo sangkarung mongoi id natad walai di sungkad-tukad, posidangon om tamangan diolo do hilo. Nokoumbal nogi isio do awu minongoi sikul tu manamong noh do sinidang. Koubasanan noh gia do kimanauk id natad do walai di pogulu poh.

Kalasu poh ii sinidang, mangan nodi diolo tutuo momoguno di tosung om tooluh di sungkad-tukad. Otutuh poh om atapan nogi. Nung awu poh noutok, tutuon noh kawagu gisom do outok. Mangan noh kaagu atapai poguluh do sirihon.

Koubasanan noh kawagu do iri nopo monirih do wagas nga iri sanganu di tosung. Opongoh poh do monirih om pibogion noh ii wagas. Duo boogian di sanganu do parai om iso boogian di minonirih. Iri boogian di sanganu do parai nga piduoon nogi  tu mongolon podii di wagas do noolos.

Songkuro sinonong nung kitosung om kitooluh iyolo kio?

Songulun tina maso do monutuh

Tosung om tooluh

Pinogonuan gambar: