Pason Kointutunan / Kabar Nopili

Kopisanangan kumaa toinsanan tompinai om tambalut Dusun. Minaanku pohoroo o bolog diti sobaagi do ponimungan di bobolog i pinosurat doid boros Dusun. Alansan oku kumaa do tongotompinai om tangatambalut di kiharo bolog toi ko nokoilo do haro bolog om nunu nopo iri pinosurat id boros Dusun toi ko Kadazan (Tulun Kadai /Tangara) do popoilo doho maya do bolog 'Iso Dusun' diti. Kanou no misokodung do popoingkakat babasaon do id tompok tunturu tu insan tadau, tulun Dusun om woyoboros Dusun nga kotongkop nogi id sompomogunan.  | 

TUTUMANUD

Thursday, July 17, 2014

Minonunsung om nosunsungan

Nokotongkop tomod nopo ti susuyan kinaantakan do korita kinumbur CDM25. Sundung tu notoliban noh kinaantakan dilo tu haro nosunsungan om haro nokosunsung, nga osonong iti do maan soroho sobaagi do ponontudukan kumaa dati toinsanan. Awuku noh maan hulito ilo tu ogumu kopio id bolog om nogi id mogisusuai rumokorut nga maanku nogi posusuyo kinaantakan ii nawayaanku sondiri.

Nogonop noh 24 jaam mantad do kinaantakan CDM25 do nosunsungan, koritaku sondiri nga nosunsungan nogi. Kinaantakan diti naantakan soira do sinumoliwan oku kumaa id talun-alun tagayo. Masoku id talun-alun, pamanaho nogi kaagu di doribo (driver) iri korita dau do mantad poundorong id disan do talun-alun om kosunsungai nodi totobon do koritaku.

Poindisanoku iri koritaku om intaaiku noh iri doribo do korita di minonunsung do koritaku. Songulun tondu kiumur kikira do 30-an. Nouruh boh gia isio do nakagagang om poundorongo nopo disio iri korita disio id tanga do talun-alun. Soliwan noh isio om intaai noh disio iri korita dau. Natatak om noulakan disio boh gia bampo (bumper) dii korita dau. Korita disio nopo nga viva kiwotik do opurak.

Suhuoku isio do sinumunsuri om poundolihoku no noh iri bampo dau id disan do talun-alun om mangai no disio poindisano iri korita disio.

Awu isio mangakun do nakasala isio om yoho nga awu nogi monondos do nakasala isio nga tumanud di kinoyonon disio do minundorong pogulu do nokosunsung isio nga nokosunsung noh isio do kooturan (undang-undang) tu pinoundorong disio iri korita disio id tampat do pogoduhan mundorong.

"Siou. Oilaanku do ingaa boh gia tumomod do monunsung nga poingkuro kito diti?" kangku do pinopotimpuun do sorita, miampai poiniggit do dunsul do momodunsul di soromin do korita dau.

"Awu ko toi nokokito dii soginolku?" ka disio do minongimuhot.

"Poingkuro oku boh do kokito. Yoho nga mongintong nogi di korita santalib-talib id talun-alun. Iri poh koritanu nga awuku nokito tu okoro kopio." kangku do sinumimbar.

"Araat noh kopio nasip diti koritaku. Soira koima do muli kampung, kosunsung nogi. Koinduo oku noh do nokopisunsung. Awu noh kaagu kouli do kampung diti." ka disio.

"Ingaa boh gia tulun do tumomod popinsunsung korita. Nga nokopisunsung nodi om kalabus nodi tusin do pomonsoi dilo nokumpit. Nung poruputon dati id pulis nga goduduo kito do mambayar sopitolu nahatus songulun." kangku.

"Andado po do toruhai tu awu oku moti mangakun do nakasala oku. Tolipounaiku poh iri tabangonku" ka disio.

Tolipaunai no disio ii tompinai disio. Oruhai om korikot noh tompinai disio om posusuyo noh disio do poingkuro isio do nokosunsung. Pinosusuiku nogi do poingkuro oku do sinumuang id talun-alun tagayo om hinonggo do nosunsungan koritaku. Ongoyo noh dii tompinai do doribo tandu intangai iri totobon do koritaku ii nosunsungan.

"Poingkuro di panalasaian dokoyu? Ilo nopo dika dilo nga okuri kinorumbakan. Milo do porianan momonsoi." ka disio kumaa di tompinai disio.

"Awu oku mangakun do nakasala oku. Sompopori do momonsoi." ka di doribo tondu.

"Kaakun oku do sompopori do momonsoi nga awu kotoboi ginawoku do mangakun isio do awu nakasala tu nung okon ko isio nakasala, tantu do yoho nakasala." kangku.

"Okon ko miagal diri. Nung kopinsunsung nga mimang do haro songulun nakasala. Nga poingkuro panalasaian dokoyu?" ka di tompinai di doribo tondu.

"Mimang do gunoonku insuranku ondiri do momonsoi diti kinorumbakan. Nga mokisokodung oku kasaari do pambayar montok poporuput id balai pulis. Okon ko ogumu. Koubasanan do 300 ringgit nga okon ko miagal diri o pokionuonku." kangku.

"Poingkuro do 200 ringgit?" ka di tompinai do doribo tondu diri.

"Miagal diri nga kabagal noh. Okon ko tinomod gia do monunsung." kangku.

Onuo disio kompilan disio om posoliwano noh tusin soginumu do 200 ringgit. Romitoku ii tusin diri om pogitabi-tabi no yahai.