SISINDIRON MONTOK KDM

Solokou monuka, kopisanangan om tabi pisompuruan kuma tompinai ngawi. Siwat-siwato poh da dikoyou mambasa iti sisindoronku.

SISINDIRON MONTOK KDM

Oi tambalutku do KDM
Koilo kou poh nangku do mindahu?
Koilo kou poh nangku migit do tulu dangol?
Koilo kou poh nangku do rumilik?
Koilo kou poh nangku do mongurak?
Koilo kou poh nangku do mangasok?
Koilo kou poh nangku do momuhau?
Koilo kou poh nangku do mongomot?
Koilo kou poh nangku do misisikot?
Minsundawil?
Kotutun kou poh nangku dilo bonut?
Iloh koting-koting?
Ih pungaranan do linggaman toi koh langgaman?

Oi ambalut
Koilo kou poh nangku do mongintorus?
Kotutun kou poh nangku dilo kasip toi koh rungkasip?
Sungul?
Walatik?
Kotutun kou poh nangku dilo tabpai?
Gado om gaba?

Siakan kou poh nangku dilo tinanok do kasou?
Tinanok do bongolon?
Toi tinanok om linugu do monduk?
Siakan kou poh nangku do pinangkaran?
Bosou om nonsom?
Kosilup kou poh nangku do linsou dilo tutan?
Sansam?
Lomiding om Kurunsong?

Au monguro oi ambalut
tu andang noh do nokoburu iti pomogunan

Nga urolos poh do toruhai oi ambalut
posik noh mantad nipi nu
hangog noh mantad todop nu
kowilio iloh tanak iih mumbal nogi do monungkamang
tataho iloh tanak iih mumbal nogi do mudong
ahako iloh tanak iih mumbal nogi do lumaang
simbongolo iloh tanak iih mumbal nogi do mimbaralang
simbongol om lilingo da doung KDM
pointutuno
posusuyo diolo iti koubasanan
barasai iyolo do boros Kadazan, Dusun om Murut
boros di poinsandad do Kinorohingan
maya di gulu-gulu, taki-aki om todu-odu tokou
tu atagak nopo boros, atalup
atalup oh tinaru
boros kointutunan do tinaru.

-MdDr-

(Dinalin mantad tinimungan Whatsapp My Kuyungon)

Momogun Nunuk Ragang

Ahandaman tokou i tangon di aki odu,
Pinosusui ontok sakag sakavi,
Varo iso nunuk tagazo,
Nunuk taragang sid Nunuk Ragang,
Sinumuni sid tanga lobong di' Aki Nunuk Ragang,

Ong suhuton nopo iri susuzan,
I nunuk ogii nopo ra'an,
Momuraha iadko raha dot ulun,
Nunuk,nakagamut sid sungkad tana,
Nakaraan om nokogirot,
Sid pialatan kogibangan om kavananan,
Pungaranan Bavang Livogu,

Aki Nunuk Ragang bobolizan tosundu,
Ki t'anak tolu kusai,
I Aki Rungsud, Aki Longuvai om Aki Turumpok,
Minihas tuh boros dot rundukan,
Sakavi i bavang antad sid burul,
Sino' oku, Lumaag minamangun,
Po murinait noh om rumikot oku..

I Aki Rungsud sid Pompod Tana,
Aki Longuvai napalid sid Pinampang,
Iso poh i Aki Turumpok,
Tandon Tongkob sid Nunuk Ragang,
Ioti noh tolu miobpinai,
Inantadon dot momogun tokou,

Sundung kotongkop pinomorunan,
Aa' handaman dahai ika oi Nunuk Ragang,
Tangon gulu amu dahai olingan,
Sunduvon gulu soluhuton vagu,
Tuh koposizan dahai poinsirili dika,
Kalangadan dahai tikid tadau,
Oulit koposizon iadko dii kodori,

Minihas notongkop pogun diti,
Om siratai noh posorili,
Iri momogun natagak noh tinaru,
Tokou sumuni om t'anganak vagu,
Ihimo tokou noh ralan di' gulu,
Potulid vagu miampai kapasi,
Gisom tungkus monungkus i ranzat,

Rinait di':
Masnah Talu (Noy Arscela) http://www.sabah.edu.my/itls07013/

SISINDIRON: KOSIMBAYANANKU

KOSIMBAYANANKU


Norikot nodi tadau do kosimbayanan ku,
Nakatalib nodi toinsanan i pinapawagat pomusarahan ku,
Nokotimpuun nodi i tadau do koundarangan,
mantad di kinorikatanku doid tana' do kinogoyoon ku.


Iti no daa o kalansanan ku,
Moi daa toririmo nopo osonong o ginawo ku,
Do monoguwang timpu do koundarangan diti.
Lihuan ku po daamot o konunu-nunuan di dong kosikul-sikulan,
Tu osodu po o timpu do momusou indoh.


Id timpu do koudarangan diti,
Alansan oku daa dot alangga nopo o pomusarahan ku.
Maha' daa om muhang-ruhang nondo o kotoronongon do pomuragadan ku.
Maha' daa om aiso nondo kobolingkahangan
di kopomohukot do pomusarahan,
Om toririmo nondo dot osonong o topurimanan ku,
do solinaid do tadau do koundarangan diti.


Id kosimbayanan ku ngai',
Sipomonsoi oku daa it osonong,
tumanud do korohian do Kinorohingan.
Moi dot a' oimbayatan o ginawo ku,
do monuhuk korohian di dong tinan,
i kapamaraag do pomusarahan dit osonong,
om i kayamut nopo iman-imanon dit olidang.



Nung sokiro daa kisinundu oku,
Om kopomutalad oku nogi,
Mintulud oku nondo id soribau do pomogunan,
Do mogihum i babang do buluntung,
do maan do ponokososokoon om ponokotindai-tindai.
Nga kuroyon podi tu tulun oku toomod,
Dot iri piya ot iman-imanonku do papalangga i pomuragadan ku.


Ondung kotindohoi o timpu,
osimbayan oku daa'ndoh gisom dot alaid,
nga' kuroyon podi tu a' miloh do potingkodon o timpu,
tu iri no katapatan di poingharo mantad.
Iri no tu timpu nga' malib-talib nopo,
gisom do kolimpupuson do tadau do koundarangan diti,
Komoyon do ko'oiyon do tadau do kosimbayanan.
Nga okon ih ko' iri ngai' o kopomusou doho,
tu iri no o kowoowoyon do timpu di natantu mantad.


Pagatangon ku o timpu ku ngai',
Do solinaid do haro po o kosimbayanan ku,
Om manu oku daa,
dot a' nondo orubatan o timpu ku ngai',
Gisom do kolimpupuson do tadau do koundarangan diti.



Sinuratan di : Andreas Alex John [Pitimungan Do Dusun (Group)]
20.11.2011
jam 20:11 (8.11pm)

Nunu poinsuang do bolog diti?

Mogisusuai po posuangonku do id bolog diti. Nunu nopo iri kagayat do ginawo tulun ginumuan do mambasa miagal po toi do;

• Susuyan
• Tangon
• Sundait
• Sisindiron
• Sinding
• Sudawil
• Tudodoi
• Tukadan
• Kabar-kabar
• Kopoilaan
• Bukakak
• Bahul 
• Om susuai po

Alansan oku do maya do bolog diti, kapanahak dah do tua pomusarahan kumaa di mambabasa ngawi.