Ka pangaraja

Ka pangaraja nopo nga tinimungan ka di maan wonsoyo toi maso poimpanau. Ka do pangaraja diti opibaagi do duo kawo. iri nopo nga;

1. Ka pangaraja kikakamot
2. Ka pangaraja ingaa kakamot

Ka pangaraja kikakamot nopo diti nga mositi do haro kakamot om owonsoi nogi do ayat. Ka pangaraja kikakamot diti opibaagi po kaagu do duo kawo. Iri nopo nga;

1. Ka pangaraja kikakamot wonsoion
2. Ka pangaraja kikakamot winonsoi

Ka pangaraja kikakamot wonsoion nopo nga popoilo do maso wonsoion ontok do timpu nokomoi miagal do monombir, mongolihung, mangakan, monginum om susuai poh.

Ka pangaraja - ih momonsoi - kakamot wonsoyon (ka pomungaran)
Mongolihung iy Komburo do piring.
Mangakan iy Kalabatu do takano.


Ka pangaraja kikakamot nowonsoi nopo nga popoilo do nowonsoi no iri karaja toi nunu-nunu nopo iri notoguangan. Mibagal do tinandang, tinombir, winonsoi, naakan, noinum om susuai poh.

Pomitanan;

Ka pangaraja - ih momonsoi - kakamot nowonsoi (ka pomungaran)
Tinandang di Godomon ilo buul. (Awu ogonop nung posuraton toi poboroson do 'Tinandang di Godomon')
Tinombir di Bibi ilo soluar.

Ka pangaraja ingaa kakamot nopo diti nga iri momonsoi montok nopo do tinan sondiri. Ka pangaraja ingaa kakamot diti nga opibaagi po kaagu do duo. Iti nopo nga;

1. Ka pangaraja ih momonsoi kipomoogonop
2. Ka pangaraja ih momonsoi mingkakat sosondiri

Ka pangaraja ih momonsoi kipomogonop nopo nga ka maan di mositi suhutonon do pomogonop montok popokito do komoyon di ayat.

Pomitanan;

Ka pangaraja - ka pomogonop - ih momonsoi
Nokorikot noh iy Polina. (Tagakon nopo patod boros 'noh' nga awu ogonop ot ayat)
Jumadi do mongi-ngira iy Sirin.
Koodop ilo tasu.

Ka pangaraja ih momonsoi mingkakat sosondiri nopo nga maan di kirati sundung tu aiso ka pomogonop. Id boros Dusun nopo nga koubasan do milo popisomputulon it ayat.

Pomitanan;

Ih momonsoi - ka pangaraja

Walai nogumpi. / Nogumpi walai.
Tasu napatai. / Napatai tasu.
Rodiu monguni. / Monguni rodiu.
Iy Poulina monsu. / Monsu iy Polina.