KONINGAU: Huguan Parti Bersatu Rakyat Sabah (PBRS) Tan Sri Joseph Kurup minoboros ponuridangan Kulij Kadazan Dusun om Murut toi ko Kulij KDM id Sabah kosudong om mositi sokodungon sawi-awi mogiigiyon pogun (mamasok).
Minoboros isio diti saasabap no do kulij dino okon nopo gunoon montok popoburu mogiigiyon tinaru dino miampai tinaru suwai id siribo konsip 1Malaysia nga nogi koowit liab papantod pilumaagan, tu aiso tinaru iy kopuriman koingisan miampai ponuridangan dino.
“Iti nopo nga iso toilaan toi ko poguludan di tawasi. Yahai id PBRS monokodung atag ponuridangan Kulij KDM id Sabah i pointantu no do koowit mogiigizon Kadazan Dusun om Murut kumaa boogian di lobi kinawas,” ka disio kuminaa Bernama id doiti, di konihab.
Kurup iy nogi Kumoduo Montiri Sandad Potinagas om Sandad Posorili minoboros dino ontok minonugut atag Koisaan Kotundunan om Balajaran Kadazandusun Murut Sabah (Pekadin) Tadau Minggu nakatalib, mooi Kulij KDM turidongon id Sabah.
Tumanud Pekadin, ponuridangan kulij dino kaanu monulung papatahak tonggungan mogiigiyon Kadazan Dusun om Murut loolobi no kopio id suang balajaran kopitanud miampai liab pogun iy mokianu adadi iso pogun koburu korikatan 2020.
Pogulu diti Koisaan Pasok Momogun Kadazandusun Murut Bersatu (Upko) nga nokopolombus laid sokodung kumaa atag dino, om pointounda monulung id suang pongkimamaan mongintong atag dino.
Huguan dino Tan Sri Bernard Dompok minoboros koponuridangan Kulij KDM nopo nga iso kogunaan kumaa sawi-awi loolobi no kopio mogiigiyon tinaru dino id suang pongkimamaan popoinsawat boos om toilaan koubasanan Kadazan Dusun om Murut.
Pinadalin mantad kabar New Straits Times: 19/05/2011 (http://www.newsabahtimes.com.my/nstweb/fullstory/48835)
No comments:
Post a Comment